جدائيءَ جو آخري نظم

ـــــــــــــــــــــــــــــــــــــــ رياضت ٻرڙو
تنھنجي باري ۾
يا تو لاءِ لکيل
سڀئي نظم
مون ڪڏهن بہ ڇپرايا نہ آھن،
ڇاڪاڻ تہ
انهن کي پڙھڻ جو حق
صرف تو کي ئي آھي.
خبر ناهي
تہ تون ڪٿي آهين،
ڪڏهن ملندينءَ،
يا ملي بہ نہ سگهندينءَ،
۽ تو سان ملڻ کان
يا تو کي نظم ٻڌائڻ کان
اڳ ئي
آئون مري ويندس.
مون کي خبر ناهي
تہ منھنجي مرڻ پڄاڻان
انهن نظمن جو ڇا ٿيندو،
ڇاڪاڻ تہ آئون،
جڏهن کان تون وئي آهين،
اڪيلي زندگي گذاري رهيو آهيان.
آئون مري وڃان ھا،
پر تنھنجي باري ۾
۽ تو لاءِ نظم لکندٖي ئي
زنده رھي سگهيو آهيان.

اڃا ڪو تاثر ناهي.